Auga de Fervenza para "bendicir" a traxectoria artística de Paco Lareo

O escultor e alma máter da Solaina, homenaxeado en terras estradenses

A ESTRADA. C.LISTE

Xosé Luna, á esquerda, co artista homenaxeado Paco Lareo FOTO: Sangiao

Non atopaba palabras para describir o que sentiu cando se enterou da que lle tiñan preparada na Estrada. Alí, onde deixou a súa pegada inmortalizando na pedra a poetisa do Ulla, Avelina Valladares, e outras máis, os seus compañeiros e amigos de Edicións Fervenza quixeron renderlle unha merecida homenaxe. Foi no Recreo Cultural, onde preto dun centenar de persoas acompañaron ao polifacético artista, e alma máter da Fundación A Solaina de Piloño, dende onde sigue demostrando cada día, dende hai anos, que o universo do rural ten moito que dicir na cultura.

E, precisamente, polo seu traballo a prol da cultura, os de Fervenza, con Xosé Luna ao fronte, dedicáronlle este recoñecemento, ao que se sumaron amigos como Vázquez Pintor, Francisco Pillado, o seu compatriota Neira Vilas (que enviou unha carta de adhesión), o seu Concello, Vila de Cruces, o da Estrada, de Forcarei... a familia de Xesús Golmar e o colexio de Lalín que leva o seu nome, o Recreo Cultural, a familia de Reimóndez Portela... e a voz do tenor de Carbia, César Torres.

Lareo lévouse emocionados aplausos, agasallos como a auga de Fervenza, proxecto co que cola- borou dende o principio cos seus deseños, e moitas sorpresas.

Dende a editorial estradense chegaba unha das grandes: Camiño de volta, o conto do artista de Piloño toma forma de peza teatral. E non ha tardar moito en ser representado.