Arzúa arrebolou sachos e tirou dos carros porque... ¡Queremos 2008!

25.08.2008 A carballeira de Zarra acolleu a máis de 700 persoas na décima edición da festa máis ‘pilla’

ARZÚA. BEA CEBRO

Os osados que se atreveron a tirar do carro durante 36 metros para lograr o título deste campeonato mundial FOTO: BC

"Queremos... ¡unha festa!. Pero ¿de qué?. Pois mira do ¡San Queremos!", así naceu esta festa pagana tan orixinal en Arzúa que celebrou o pasado sábado a súa décima edición e, como ben din os seus fundadores, creouse "por unha pillería xa que non había festa algunha na segunda quincena de agosto" polo que non dubidan en asegurar que "é unha forma sobre todo para xuntalo pobo e pasalo ben". A festa básase en singulares deportes que se valen das antigas ferramentas da labranza.

Con esta carta presentación é máis que lóxico que a carballeira de Zarra do Monte, en Vilantime, xuntara o pasado sábado a máis de 700 persoas.

Así, despois don boa comilona, e porqué negalo, de mollarse tamén por dentro, comezou a diversión. Os e as máis osadas apuntáronse no VIII campeonato mundial de tiro do carro no que, arrancando o sudor de moitos, empurraron con toda a súa forza enganchados o xugo. Logo xurdiu un espontáneo xogo de tiro de corda no que as mulleres alcanzaron ó poder. E despois, o mellor: o X Arrebolamento de Sacho. ¡Coidao cas cabezas que alá vai!, soaba mentres os sachos voaban polas leiras.

A festa continuou cun torneo, máis tranquilo xa, de futbolín e logo viñeron os mareos cos merengues no concurso de baile. A festa resistiu ata a madrugada acompañados de música e pólvora.